Pater Kristianus Risco Batbual, SVD, i selebretim 17 yia jubili

Pater Kristianus Risco Batbual, SVD, i selebretim
17 yia bilong wok pater long Riwo ples, Madang.

Pater Kristianus Risco Batbual, SVD, i selebretim 17 yia jubili bilong wok pater bilong em insait long Katolik Sios wantaim ol peris manmeri na pikinini bilong Santu Imakulata Konsepsen Sios bilong Riwo ples tude, Sande, Septemba 21, 2025.

Santu Imakulata Konsepsen Sios em wanpela autstesin insait long Holi Spirit Peris bilong Alexishafen o Seg, bilong Madang Asdaiosis.

Pater Risco i kam long Indonesia.

Pater Patrick Gesch, Pater Kristianus Risco Batbual,
tupela SVD pater i celebretim 17 yia jubili bilong
Pater Risco long Riwo ples wantaim Pater Francil 
Yass na ol pipel bilong Riwo.

Dispela em i namba wan taim tru bilong em bilong selebretim jubili bilong em long wok pater long Papua Niugini.

Ol Katolik mama bilong Riwo ples i go pas long kirapim wok bilong painim moni, bungim kaikai, na redim ol presen bilong givim long Pater Risco.

Ol i givim present tu long Pater Patrick Gesch, SVD, na Pater Francis Yass, wanpela Daiosisen pater bilong Riwo.

Pater Patrick, SVD, na Pater Francis i bung wantaim Pater Risco na selebretim Santu Misa.

Tude ol mama i pinisim olgeta dispela wok wantaim ol bilip manmeri na pikinini bilong Riwo wantaim wanpela Santu Misa, bung kaikai, na ol singsing, na danis, wantaim Pater Risko, Pater Patrick, na Pater Francis.

Pater Risco i askim ol bilip manmeri na pikinini long yusim olgeta blessing God i givim ol long lukautim ol arapela tu olsem God yet i laikim.

Ol Katolik yut bilong Riwo i amamasim 
Pater Kristianus Risco Batbual wantaim ol 
singsing tumbuna na mix rekod musik na danis 
bilong tumbuna na bilong ol ausait lain. 

Em i tenkim ol mama, yut, na olgeta Katolik manmeri na pikinini bilong Riwo long bilasim haus lotu, mekim naispela lotu singsing, na bung wantaim em na Pater Patrick, na Pater Francis long selebretim 17 yia bilong wok pater bilong em.

Nau yet Pater Risco i tisim musik long Divain Wod Yunivesiti (DWU) long Madang.  Bipo long dispela em i bin wok olsem pater bilong Holi Spirit Peris long Alexishafen.

Wanpela olpela siaman bilong Peris Pastorel Kaunsel (PPK) bilong Santu Imakulata Konsepsen Sios bilong Riwo, Adolf Sakio i tenkim Pater Risco long gutpela wok em i bin mekim taim em i bin stap olsem pater bilong Alexishafen.